काठमाडौं, ७ जेठ । प्रमुख प्रतिपक्षी दल नेकपा एमालेले नेपाली कांग्रेसका सभापति शेरबहादुर देउवालाई प्रधानमन्त्री नस्वीकार्ने संकेत गरेको छ ।
स्थानीय तहको पहिलो चरणको निर्वाचन सम्पन्न गरेसँगै पुष्पकमल दाहाल प्रचण्डले यसैहप्ता राजीनामा गर्ने भएपछि कांग्रेसभित्र देउवालाई प्रधानमन्त्रीको सपथ खुवाउने तयारी भइरहेका बेला एमालेको सांकेतिक धारणा आएको हो ।
नयाँ सरकार गठनको गृहकार्य भइरहँदा एमाले स्थायी समिति सदस्य एवं पूर्वमन्त्री शंकर पोखरेलले चुनाव अगाडि सत्ता परिवर्तन आचारसंहिता र राजनीतिक नैतिकताका दृष्टिले उचित नहुने भन्दै प्रधानमन्त्री प्रचण्डको ध्यानाकर्षण गराएका छन् ।
पोखरेलले आइतबार साँझ सामाजिक सञ्जाल फेसबुकमार्फत भनेका छन्- ‘प्रतिपक्षमा रहेको एमालेलाई प्रचण्ड र देउवा जो प्रधानमन्त्री भएपनि फरक पर्ने कुरा होइन । तर, पहिलो चरणको निर्वाचन सम्पन्न भइसकेको अवस्थामा दोश्रो चरणको निर्वाचन गर्न नयाँ सरकार गठन गर्ने कुरा निर्वाचन आचार संहिता र राजनैतिक नैतिकताका दृष्टिले उचित कुरा होइन । यस विषयमा सत्ता गठवन्धनमा रहेका दलहरुको ध्यान जाओस् ।’
सुत्रहरुका अनुसार कांग्रेसभित्रै पनि दोस्रो चरणको चुनाव पनि प्रचण्डकै नेतृत्वमा गर्नुपर्ने आवाज उठ्न थालेको छ जसले गर्दा देउवा तत्कालै प्रम बन्ने सम्भावना कम हुँदै गएको बताइन्छ ।दैनिक नेपालबाट साभार
