काठमाडौँ, ५ असार । वित्तीय अपराध मैलाउँदै जाँदा कैलाश विकास बैंकको पनि ठगी प्रकरण सार्वजनिक भएको छ ।

पोखराको लामाचौर शाखाका प्रबन्धक रवीचन्द्र खनाल आफै एकाएक फरार भएपछि ठगीको रहस्य खुलेको हो । ठगी प्रकरणको अनुसन्धान गरिरहेको नेपाल प्रहरीको केन्द्रीय अनुसन्धान व्युरोले घटनामा संलग्न सात जना कर्मचारीलाई नियन्त्रणमा लिएर कारबाही प्रक्रिया अगाडि बढाएको छ । सीआईबीको प्रारम्भिक अनुसन्धानमा निकै ठूलो ठगी देखिएको छ । ‘हाम्रो अनुसन्धानमा २ करोड ८१ लाख ७० हजार हिनामिना गरेको देखिएको छ ।’- अनुसन्धान सकेर काठमाडौँ फर्केका सीआइबीका इन्स्पेक्टर टीका रेग्मीले दैनिक नेपालसँग भने ।

यस्तो छ बैंकको लापरबाही

पोखराकै एक सहकारीको नाममा भएको चेक लिएर ग्राहक कैलाश विकास बैंकको न्युरोड शाखामा पुगे । २० लाख रुपैयाँ भुक्तान लिन अन्तिममा ४६ नम्बर भएको चेक लिएर उनी त्यहाँ पुगेका थिए ।

उक्त नम्बरको चेकबाट पहिला नै लामाचौर शाखाबाट रकम भुक्तानी भएको बैंकको सिस्टममा देखियो । टेलरका कर्मचारीले लामाचौर शाखाका तत्कालीन ब्रान्च मेनेजर रविचन्द्र खनाललाई फोन गरे । खनालले ४६ को ठाउँमा ४७ नम्बरको चेक इन्टी गरेर पैसा दिन भने । न्युरोड शाखाका टेलरका कर्मचारीले त्यसै अनुसार गरे । अर्को दिन फेरी त्यही सहकारीको ४७ नम्बरको चेक न्युरोड शाखामै साट्न पुर्याइयो । सहकारीलाई नसोधी बैंकका कर्मचारीले पुन खनाललाई नै सोधे ।

४७ को ठाउँमा ५९ नम्बर इन्ट्री गरेर रकम दिन भने । त्यसै अनुसार रकम भुक्तान भयो । ठगी प्रकरणमा बैंकका म्यानेजर खनालमात्रै नभई अन्य कर्मचारीको पनि मिलेमतो देखिएको छ । सोही आरोपमा प्रहरीले गत सोमबार कैलाश बैंकको पोखरा, न्युरोड शाखाका ३ कर्मचारीलाई पक्राउ गरेको छ ।

पक्राउ पर्नेमा अपरेसन इन्चार्ज लक्ष्मी कँडेल, टेलर सुष्मा शर्मा र दीपिका कोइराला रहेका छन् । उनीहरुले बिनाचेक पटकपटक नम्बर फेरेर भुक्तानी दिने गरेको भेटिएको छ । प्रहरीले यसअघि नै ४ जना कर्मचारीलाई पक्राउ गरी बैंकिङ कसुर ऐन २०६४ अनुसार मुद्दा अगाडि बढाएको छ ।

यसअघि लामाचौर शाखाका अपरेसन इन्चार्ज शिवराज अधिकारी, सहायक कर्मचारी रिगु आचार्य केसी, रविना थापा र सीमा पन्थ पक्राउ परेका थिए ।

ठगी गर्ने खनाल अमेरिका टाप

बैंक र सर्वसाधारणको करोडौ रकम हिनामिना गर्ने कैलाश विकास बैंक लामाचौर शाखाका तत्कालिन म्यानेजर भने अमेरिका पुगेको खुलासा भएको छ । उनले सामाजिक सञ्जालबाटै आफू अमेरिका पुगेको जानकारी दिएका छन् ।

लायन्स क्लबको कार्यक्रमका सिलसिलामा एकपटक अमेरिका घुमेर फर्केका उनीसँग अमेरिकाको ५ वर्षको भिसा थियो । गत चैत ३१ गते साँझ साढे ७ बजेसम्म खनाल कार्यालयमै रहेका खनाल बैशाख १ गते अरु साथीहरुलाई बैंकको चाबी पठाएर बेपत्ता भएका थिए ।

बैंकले बैशाख ३ गते नै केन्द्रीय कार्यालयबाट अडिट टोली पठाएर लामाचार शाखाको लेखापरीक्षण सुरु गरेको थियो । घटनाबारे थाहा पाउनासाथ बैंकले सीआइबीमा उजुरी दिएको थियो ।

बैंकले अभियुक्त खनालको घरजग्गा रोक्का गरिसकेको छ । खनालले केही सहकारी संस्था र दर्जनभन्दा बढी सर्व साधारणसँग पनि मोटो रकम उठाएको भन्दै उजुरी परेको छ । जसअनुसार उनले १० करोड रुपैयाँको हाराहारीमा ठगी गरेको हुनसक्ने अनुमान गरिएको छ । ‘खनाल अमेरिका पुगेको जानकारी आएको छ, श्रीमतीले पनि त्यही कुरा बताएकी छिन्, यसबारेमा अनसन्धान गर्दैछौँ ।’- इन्स्पेक्टर रेग्मीले दैनिक नेपालसँग भने ।

आठ र तीन महिनाकी गर्भवती पनि प्रहरी हिरासतमा

ठगी प्रकरणको अनुसन्धानका लागि हिरासतमा रहेकी बैंककी कर्मचारी रिगु आचार्य केसी ८ महिनाकी गर्भवती हुन् । पोखरा लेखनाथ महानगरपालिका वडा नं १९ लामाचौरकी उनी बैंकका अन्य कर्मचारीसँगै हिरासतमा छिन् ।

यसैगरी, गतसाता प्रहरी हिरासतमा पुगेकी दीपिका कोइराला तीन महिनाकी गर्भवती हुन् । हिरासतमा राखी गर्भवती महिलालाई मानसिक यातना दिँदा उनको स्वास्थ्य अवस्था दिनदिनै बिँग्रदै गएको भन्दै परिवारले छाडिदिन आग्रह गरेका छन् । तर, जिल्ला सरकारी वकिलको राय अनुसार प्रहरीले उनीहरुलाई हिरासमै राखेको छ । ८ महिनाकी गर्भवती भनिएकी रिगुले म्यानेजर खनाललाई सहयोग गरेको देखिएको छ । तर, चिकित्सकको रिपोर्टमा उनीहरु दुबै जनाको स्वास्थ्यस्थिति ठीक देखिएको छ । प्रहरी इन्स्पेक्टर रेग्मी भन्छन् – ‘अन्य कर्मचारीको सहयोगबिना यति ठूलो ठगी हुनै सक्दैन् । त्यसैले रकम हिनामिनामा अरु पनि संलग्न देखिएका छन् ।’

अब के हुन्छ ?

हिनामिनाको जानकारी पाउनासाथ पोखरा पुगेको सीआईबीको टोली आइतबार काठमाडौँ फर्किएको छ । सीआईबीले अनुसन्धान विवरण तयार पारेर आफ्नो रायसहित जिल्ला प्रहरी कार्यालय र वकिल कार्यालयलाई रिपोर्ट बुझाएको छ । बाँकी कारबाही जिल्ला प्रहरीले नै अगाडि बढाउँछ । सीआइबीका इन्स्पेक्टर रेग्मीले भने -‘म्यानेजर खनालले अन्य कर्मचारीलाई पनि प्रभाव पारेको देखिन्छ । त्यसैले अझै सुक्ष्म रुपमा अनुसन्धान हुन्छ ।’दैनिक नेपाल