पहाडमा सबैकुरा ठिक थियो । मानिसहरु आफ्नो दैनिकीमा व्यस्त थिए । पर्यटकहरुको आवतजावत जारी थियो र दार्जिलिङको चौबाटोमा राखिएको आदिकवी भानुभक्त आचार्यको प्रतिमाले गोर्खालीलाई आफ्नो मातृभाषा नेपालीको सधैं याद दिलाइरहेको थियो ।
यस्तैमा पश्चिम बंगाल सरकाले ९ कक्षासम्म विद्यार्थीका लागि बांग्ला भाषालाई अनिवार्य गरिदियो ।
यसको उत्तर बंगाल पहाडी इलाकामा व्यापक विरोध भयो । गोर्खाल्याण्डको सेलाइसकेको आन्दोलनको आगो यो निर्णयपछि पुनः एकपटक दन्कियो ।
चोक बजारमा ‘हाम्रो माग गोर्खाल्याण्ड’ को नारा लगाइरहेका प्रितम कार्की आफ्नो मातृभाषाको विषयमा निकै गम्भीर छन् ।
