उदय सुब्बाद्वारा निर्देशित फिल्म ‘दुई कदम’को फर्स्टलुक पोस्टर सार्वजनिक गर्दै आगामी मंसिर २९ गतेलाई प्रदर्शन मिति घोषणा गरिएको छ । दुईवटा पोस्टरमध्ये एउटामा डेब्यू अभिनेता इओन लिम्बू र डेब्यू अभिनेत्री सिमोन गिरी छातामुनि रोमान्टिक भावमा देखिएका छन् भने अर्कोमा अभिनेता गौरव पहारी बन्दुक पड्काउँदै गरेको अवस्थामा चित्रित छन् । उनको साथमा सिमोन छिन् ।
अजम्बरी फिल्म्सको प्रस्तुतिमा तारा देवी लिम्बूको निर्माण रहेको फिल्ममा सुनिल थापा, कविता आले, बुद्धि तामाङ, अर्जुन गुरुङ, विमला लिम्बु, चन्दा दाहाल, जीवन लिम्बू, प्रितिका शर्मालगायतको अभिनय छ । फिल्मको एक गीतमा अभिनेता विल्सन विक्रम राईको नृत्य छ । मुस्ताङमा एक गीतबाहेक पूर्वका धनकुटा, तेह्रथुमको वसन्तपुर, इलाम, झापा र धरानमा फिल्म खिचिएको हो ।
दयाराम घिमिरेको कथा तथा पटकथा लेखन रहेको फिल्ममा विक्रम डिसीको छायांकन, ताराप्रकाश लिम्बू तथा विकास चौधरीको संगीत, डिपी खनालको गीत लेखन, राजु किराँतीको द्वन्द्व निर्देशन, रामजी लामिछानेको कोरियोग्राफी र प्रविन ढकालको सम्पादन छ । उपत्यकाभित्र रिच इन्टरटेनमेन्ट (करण श्रेष्ठ) र उपत्यकाबाहिर एफडी कम्पनीले ‘दुई कदम’को वितरण जिम्मा लिएका छन् ।
