नेकपा (माओवादी केन्द्र) का अध्यक्ष पुष्पकमल दाहालमाथि उपमहासचिव जनार्दन शर्माले पार्टी नेतृत्व छोड्न दबाब दिएको बेलामा पार्टीको विशेष महाधिवेशन गर्ने निर्णय भएको छ । जेन–जी आन्दोलनलगत्तै जनार्दनले अध्यक्ष दाहाललाई तत्काल राजीनामा दिन भनेका थिए ।
उनले आफूनिकटका नेताहरुसँग छलफल गरेर दाहालमाथि नेतृत्व छोड्न दबाब बढाएका थिए । तर, दाहाल शर्माभन्दा दुई कदम अघि बढेर मंसिरमै विशेष महाधिवेशन गर्ने तहमा पुगेका छन् । हिजो बसेको पदाधिकारी बैठकमा दाहालले देशको समसामयिक राजनीतिक विषयमा एक घण्टा लामो सम्बोधन गरेका थिए ।
उनले आफूले अब नेतृत्वमा निरन्तर रहने चाहना नराखेको प्रष्ट पारेका थिए । प्रचण्डले आगामी मंसिरको अन्तिममा विशेष महाधिवेशन गरेर नयाँ नेतृत्व ल्याउने घोषणा गरेका छन् । त्यसकोलागि उनले अहिलेको केन्द्रीय कमिटी भंग गरेका छन् । बैठकले अध्यक्ष दाहालको नेतृत्वमा नै महाधिवेशन आयोजक कमिटी बनाउने सहमति गरेको छ ।
पदाधिकारीको निर्णय अब यही असोज ९ गते बस्ने केन्द्रीय कमिटी बैठकले अनुमोदन गर्ने भएको छ । पछिल्लो समय जनार्दनले अध्यक्ष दाहालविरुद्ध निरन्तर प्रहार गरिरहेका छन् । उनी आफ्नो टिमसँगमात्रै बढि छलफलमा केन्द्रित भएको र नेतृत्वसँग कुनै सहकार्य नगरेको आरोप लागेको छ ।
पदाधिकारी बैठकले अहिलेको केन्द्रीय कमिटीलगायतका सबै कमिटी भंग गरेको अवस्थामा पनि शर्माले भने वरिष्ठ उपाध्यक्ष नारायणकाजी श्रेष्ठलाई कार्यवाहक दिएर जानुपर्ने मत राखेका थिए । पदाधिकारी सबैले राजीनामा दिनुपर्छ भनेका शर्माले पदाधिकारी नै रहेका वरिष्ठ उपाध्यक्ष श्रेष्ठको नाम लिएपछि पनि उनको आलोचना भएको छ ।
