काठमाडौँः ‘एभरेष्ट म्यान’ का रूपमा विश्वभर परिचित प्रख्यात नेपाली पर्वतारोही कामी रीता शेर्पाले विश्वको सर्वोच्च शिखर सगरमाथाको ३२ औँ पटक सफल आरोहण गरेर नयाँ इतिहास रचेका छन्। ५६ वर्षीय शेर्पाले आइतबार (३ जेठ २०८३ / १७ मे २०२६) बिहान १०:१२ बजे सगरमाथाको चुचुरोमा पाइला टेकेका हुन्। यससँगै उनले इतिहासमै सबैभन्दा बढी पटक सगरमाथा आरोहण गर्ने आफ्नै विश्व कीर्तिमानलाई थप अगाडि बढाएका छन्।
पर्वतारोहण क्षेत्रका एक जीवित लिजेन्ड मानिने कामी रीताले अन्तर्राष्ट्रिय आरोही दलको नेतृत्व गर्दै यो ऐतिहासिक सफलता हासिल गरेका हुन्। सगरमाथा आधार शिविर (बेसक्याम्प) स्थित पर्यटन विभागको फिल्ड कार्यालयका अनुसार सफल आरोहणपछि उनी र उनको टोली अहिले सुरक्षित रूपमा आधार शिविरतर्फ ओर्लिरहेका छन्।
सन् १९९४ मा २४ वर्षको उमेरमा पहिलोपटक सगरमाथाको सफल आरोहण गरेका कामी रीताको हिमालसँगको यात्रा तीन दशकभन्दा लामो भइसकेको छ। उनले सन् २०१८ देखि निरन्तर रूपमा संसारकै सबैभन्दा बढी सगरमाथा चढ्ने कीर्तिमान आफ्नो नाममा राख्दै आएका छन्। यसअघि उनले गत वर्ष अर्थात् सन् २०२५ मे २७ मा ३१ औँ पटक सगरमाथाको शिखर चुमेका थिए। सोलुखुम्बुको थामे गाउँमा जन्मिएका उनको रगतमै हिमाल बगेको छ, किनकि उनका बुबा पनि १९५० को दशकमा नेपालले विदेशीका लागि सगरमाथा खुला गरेपछिका सुरुआती व्यावसायिक शेर्पा गाइडहरूमध्ये एक थिए।
कामी रीता शेर्पा केवल नेपालका राष्ट्रिय नायक मात्र नभएर विश्व पर्वतारोहण समुदायकै एक सर्वकालीन महान् प्रतीक र प्रेरणाको स्रोत हुन्। सगरमाथाबाहेक उनीसँग ८ हजार मिटरभन्दा अग्ला अन्य हिमालहरू (जस्तै चो ओयु, मनास्लु, केटु र ल्होत्से) गरी कुल ४४ पटकभन्दा बढी सफल आरोहण गरेको असाधारण अनुभव छ।
यो ऐतिहासिक कोसेढुङ्गा पार गरेपछि पर्यटन विभाग र पर्वतारोहण क्षेत्र आबद्ध एजेन्सीहरूले उनलाई हार्दिक बधाई ज्ञापन गरेका छन्। उनलाई काठमाडौँमा भव्य स्वागत गर्ने तयारी भइरहेको छ।
