युटुबमा रिलिज भएको ३६ दिनमा चलचित्र ‘छक्का पन्जा ३’मा समावेश ‘पहिलो नम्बरमा’ बोलको गीतले १ करोड भ्यूज पाएको छ । यो गीतलाई युटुबमा सर्वाधिक रुचाइएको छ । गीत अहिले पार्टी र विभिन्न कार्यक्रममा समेत बज्न थालेको छ । गीतले १ करोड भ्यूज पाएको अवसर पारेर आज काठमाण्डौमा केक काटेर सेलिव्रेशन पनि गरिएको छ ।
दिपक शर्माको संगीतमा तयार भएको यो गीतमा राजेन्द्र थापाको शब्द, डेभिड शंकर र विन्दु परियारको स्वर छ । गीतले १ करोड भ्यूज पाएको र संगीतकार दिपक शर्माको जन्मदिन परेको अवसरमा आज केक काटिएको हो । रेडियो अडियोमा आयोजित कार्यक्रममा चलचित्रका मुख्य कलाकार दिपकराज गिरी, जितु नेपाल, केदार घिमिरे, निर्देशक दीपाश्री निरौला उपस्थित थिए ।
कलाकार तथा निर्माता दिपकराज गिरीले छोटो समयमा नै गीतलाई दर्शकले माया दिनुभएको भन्दै यसपटक चलचित्र पनि अगाडि २ श्रृङ्खला भन्दा फरक रहेको बताए ।
निर्देशक दीपाश्री निरौलाले सबै कलाकारको साथले आज गीत हिट भएको भन्दै चलचित्रले पनि माया पाउने विश्वास व्यक्त गरिन् । चलचित्रको दोश्रो गीत चाडै नै सार्वजनिक गर्ने तयारी गरिएको निर्माणपक्षले बताएको छ । यो चलचित्र दशैंको अवसर पारेर रिलिज हुँदैछ ।
