बलात्कारपछि हत्या गरिएकी १३ वर्षीया किशोरी निर्मला पन्तको डिएनए परीक्षणका लागि अमेरिका पठाउने प्रहरी अगाडि बढाइएको प्रहरीको उच्च स्रोत स्रोतले जनाएको छ । निर्मलाको डिएनको वैधानिकतामै प्रश्न उब्जिएपछि प्रहरीको विधि विज्ञान प्रयोगशालाबाट अमेरिका पठाइन लागेको स्रोतले दावी गरेको छ ।
यसअघि राष्ट्रिय मानव अधिकार आयोगले पनि डीएनएको वैधानिकतामाथि प्रश्न उठाएको थियो । निर्मला पन्तको बलात्कार र हत्याका मुख्य अभियुक्त पत्ता लगाउने मुख्य प्रमाण ‘इलेक्ट्रोफेरोग्राम’ परीक्षणको प्रक्रियामाथि पनि प्रश्न उठेको छ ।
विज्ञहरुले डिएनएको समग्र संकलन प्रक्रियाका लागि विज्ञ समुह गठन गर्न सुझाव दिदै आएका छन् । स्रोतका अनुसार ‘इलेट्रोफेरोग्राम’ लाई अमेरिका पठाइनेछ । यसबारे डीएनए विज्ञहरुसँग छलफल भइरहेको स्रोतले बताएको छ । स्रोतका अनुसार प्रहरीकोे विधि विज्ञान प्रयोगशालामा ‘अटोसोमल एसटीआर’ निकाल्ने उपकरण मात्रै रहेको र अन्य उपकरण नरहेपछि विस्तृत रिपोर्टका लागि अमेरिकाको ल्याबमा पठाउन लागिएको हो ।
प्रहरीको प्रयोशालामा भेजाइनल स्वाबबाट निकालिएको नमुना बाँकी नराखिएको अधिकारीहरुले बताउँदै आएका छन् । नमुना निकै कम भएकाले त्यसको संरक्षण गर्न नसकिएको प्रहरी अधिकारीको तर्क छ । तर विज्ञहरुले भेजाइनल स्वाबबाट निकालिएको नमुना सुरक्षित नराख्नु गम्भीर गल्ती भएको बताउँदै आएका छन् ।
प्रहरीका अनुसार निर्मलाको योनीको बाहिरी, मध्य र भित्रि भागबाट तीन फरक–फरक स्वाबको नमुना परीक्षण गरिएको थियो । निर्मलाको भेजाइनल स्वाबबाट निकालिएको नमुना प्रहरीको विधि विज्ञान प्रयोगशालामा मात्रै परीक्षण गरिएको थियो । विज्ञले राष्ट्रिय विधि विज्ञान प्रयोगशालामा किन परीक्षण गर्न पठाइएन भन्दै प्रश्न उठाउँदै आएका छन् । स्रोतका अनुसार प्रहरीकै प्रयोशालाबाट कमजोरी भयो कि भन्नेतर्फ पनि अनुसन्धान शुरु गरिएको छ ।
अनुसन्धानमा संलग्न अधिकारीहरूका अनुसार डीएनए नमुना बाँकी नुहँदा अनुसन्धान जटिल बन्ने सम्भावना छ । एक अधिकारीले भने, ‘‘हामी सबै कुरामा सचेत रहँदै प्रयोशालाबाट आएको रिपोर्टलाई थप बलियो बनाउन खोजेका हौं । केही जटिलताहरु भने पक्कै छन् ।’ गत साउन १० गते साथीको घरमा निस्कीएकी निर्मला साउन ११ गते उखुबारीमा मृत फेला परेकी थिइन् ।
