काठमाडौं, १७ साउन । मेलम्ची खानेपानी आयोजनाको बालाजुस्थित पाइपलाइन सफाइका क्रममा दुई कामदारको ज्यान गएको छ ।
सप्तरी कनकपट्टीका सहोदर दाजुभाइ २५ वर्षीय सुरेश साह र २० वर्षीय शिवकान्त साहको उपचारका क्रममा त्रिवि शिक्षण अस्पताल महाराजगञ्जमा मृत्यु भएको महानगरीय प्रहरी परिसर काठमाडौंका प्रहरी उपरीक्षक अशोक सिंहले जानकारी दिएका छन् ।
सहोदर दाजुभाइ दुवैलाई चिन्ताजनक अवस्थामा बिहान साढे १० बजे उद्धार गरिएको थियो । आधा घण्टा लामो प्रयासपछि उद्धार गर्दा चिन्ताजनक अवस्थामा भेटिएका दुवैलाई उपचारका लागि पठाइएको लगतै मृत्यु भएको सिंहले जानकारी दिएका छन् ।
बालाजु चोकस्थित मेलम्ची खानेपानी खानेपानीको पाइपलाइनमा सफाइको काम गरिरहेका बेला उनीहरू फसेका थिए । कामदार पाइपलाइनमा फसेको थाहा पाउने वित्तिकै प्रहरी परिसर बालाजु बृत्तका प्रहरी उद्धारमा जुटेका थिए ।
