काठमाडौ । याक्थुङ लिम्बू जातिको प्रतिनिधिमुलक संस्था किरात याक्थुङ चुम्लुङ(किचायु)को ३६ औं स्थापना दिवसको अवसरमा आयोजित ५ दिने कार्यक्रमको पहिलो दिन साक्केलो केवाफुङवा चुम्लुङ संगीत पुरस्कार वितरण तथा छैटौं मुन्धुम स्वर्णिम साँझ सम्पन्न भएको छ ।
किरात याक्थुङ चुम्लुङ संघीय अध्यक्ष प्रेम येक्तेनको सभापतित्वमा सम्पन्न सो कार्यक्रमका प्रमुख अतिथि नेपाल प्रज्ञा प्रतिष्ठानका कुलपति भुपाल राईले लिम्बू भाषाको गीत गायन, संगीत र शब्द लेखनमा विशेष योगदान पुर्याउनुभएका अग्रज स्रष्टाहरु भगत सुब्बा, यासेली योङहाङ र प्रेम पन्धाकलाई साक्केलो केवाफुङवा चुम्लुङ संगीत पुरस्कार प्रदान गर्नुभएको थियो ।
यसै बर्षदेखि प्रदान गर्न थालिएको सो पुरस्कारवापत प्रत्येक पुरस्कृत व्यक्तित्वलाई जनही २५ हजार रुपैया र प्रमाणपत्र हस्तान्तरण गरिएको थियो ।
कार्यक्रमको दोस्रो सत्रमा सम्पन्न छैटौं मुन्धुम स्वर्णिम साँझमा येवालाङ, केलाङ, यालाङ, हाक्पारे पेन्युक साम्लो, तुवा पेन्युक साम्लो जस्ता लिम्बू जातिका मौलिक गीत, संगीतहरु कलाकारहरुले प्रस्तुत गरेका थिए ।
गत भाद्र १३ गतेदेखि सुरु भएको कियाचुको ३६ औं स्थापना दिवसको ५ दिने कार्यक्रमको मुल समारोह आगामी भाद्र १७ गते किरात याक्थुङ चुम्लुङको संघीय कार्यालय चुम्लुङहिम, ललितपुरमा आयोजना हुने छ ।
